ஒரே இரவில் 8 வீடுகளில் கொள்ளை
மட்டக்களப்பு மண்டூர் பிரதேசத்தில் ஒரே இரவில் 8 வீடுகளை உடைத்து இரு வீடுகளில் இருந்து 60 பவுன் தங்க ஆபரணங்கள் திருடிச் செல்லப்பட்ட சம்பவம் நேற்று முன்தினம் (27) இரவு இடம் பெற்றுள்ளதாக வெல்லாவெளி பொலிஸார் தெரிவித்துள்ளனர்.
வெல்லாவெளி பொலிஸ் பிரிவிலுள்ள மண்டூர் முதலாம் பிரிவிலுள்ள பிரதேசத்தில் 8 வீடுகளுக்குள் புகுந்து இரண்டு வீடுகளில் இருந்த 60 பவுன் தங்க ஆபரணங்கள் திருடிச் செல்லப்பட்ட சம்பவம் ஞாயிற்றுக்கிழமை (27) இரவு இடம் பெற்றுள்ளது.
வீட்டார் வழமைபோல வீடுகளை பூட்டிவிட்டு ஆழ்ந்த உறக்கத்தில் இருந்த நிலையில் வீடுகளின் ஜன்னல் கதவு, மற்றும் சமையலறை ஜன்னல் கதவுகளை உடைத்து வீடுகளுக்குள் நுழைந்த திருடர்கள் இரு வீடுகளில் இருந்து 60 பவுன் தங்க ஆபரணங்களை திருடிச் சென்றுள்ளதாக பொலிஸாரின் ஆரம்பக்கட்ட விசாரணையில் தெரியவந்துள்ளது.
இது தொடர்பான விசாரணைகள் தடயவியல் பிரிவு பொலிஸார் மேற்கொண்டு வருகின்றமை குறிப்பிடத்தக்கது.
