சச்சின் டெண்டுல்கருக்கு வாழ்நாள் சாதனையாளர் விருது

இந்திய கிரிக்கெட் அணியின் முன்னாள் கிரிக்கெட் வீரர் சச்சின் டெண்டுல்கருக்கு வாழ்நாள் சாதனையாளர் விருது வழங்கப்பட உள்ளது. 

பி.சி.சி.ஐயினால் இந்த விருது வழங்கப்படவுள்ளதாக PTI செய்தி நிறுவனம் தெரிவித்துள்ளது. 

இந்திய கிரிக்கெட் அணிக்காக 664 சர்வதேச போட்டிகளில் விளையாடிய டெண்டுல்கர், டெஸ்ட் மற்றும் ஒருநாள் கிரிக்கெட் வரலாற்றில் அதிக ஓட்டங்களை குவித்து சாதனை படைத்துள்ளார். 

அத்தோடு ஒருநாள் போட்டிகளில் 18,426 ஓட்டங்களையும், டெஸ்ட் போட்டிகளில் 15,921 ஓட்டங்களையும் அவர் குவித்துள்ளார்.

இருப்பினும் அவர் தனது கிரிக்கெட் வாழ்வில் ஒரே ஒரு இருபதுக்கு 20 போட்டியில் மட்டுமே விளையாடினார்.

மேலும் சர்வதேச கிரிக்கெட் போட்டிகளில் 30,000 ஓட்டங்களைக் கடந்த ஒரே வீரரும் ஆவார். 

ஒருநாள் சர்வதேச கிரிக்கெட் போட்டிகளில் முதன்முறையாக இரட்டை சதங்களைப் பெற்ற கிரிக்கெட் வீரர் சச்சின் ஆவார்

 சச்சின் டெண்டுல்கருக்கு 2013ஆம் ஆண்டு இந்தியாவில் மிக உயரிய விருதான பாரத ரத்னா விருது வழங்கப்பட்டது.

இதன்மூலம் மிக இளம் வயதில் இந்த விருதைப் பெற்றவர் என்ற சாதனையையும், விளையாட்டு வீரர்களில் இந்த விருதினைப் பெறும் முதல் வீரர் எனும் சாதனையையும் படைத்தார். 

மேலும் 1994 ஆம் ஆண்டில் அருச்சுனா விருதையும் , 1997 ஆம் ஆண்டில் விளையாட்டுத் துறையின் மிக உயரிய விருதான ராஜீவ் காந்தி கேல் ரத்னா விருதையும், 1999 ஆம் ஆண்டு பத்மஸ்ரீ விருதையும், 2008 ஆம் ஆண்டு பத்ம விபூசண் விருதினைப் பெற்றார்

இந்நிலையில் பி.சி.சி.ஐ சச்சின் டெண்டுல்கருக்கு வாழ்நாள் சாதனையாளர் விருதினை வழங்குவதாக அறிவித்துள்ளது. 

பி.சி.சி.ஐயினால் வழங்கப்படும் வாழ்நாள் சாதனையாளர் விருதை இதற்கு முன்னதாக 2023 ஆம் ஆண்டில், முன்னாள் இந்திய தலைமை பயிற்சியாளர் ரவி சாஸ்திரி மற்றும் விக்கெட் கீப்பிங் ஜாம்பவான் ஃபரூக் இன்ஜினியர் ஆகியோருக்கு வழங்கப்பட்டமை குறிப்பிடத்தக்கது.