முச்சக்கர வண்டித் திருட்டு ; ஐந்து பேர் கைது
பல முச்சக்கர வண்டிகள் திருடப்பட்ட சம்பவத்துடன் தொடர்புடைய 31 மற்றும் 54 வயதுக்கிடைப்பட்ட ஐந்து சந்தேக நபர்களை கொழும்பு மத்திய பிரதேச குற்றப் புலனாய்வுப் பிரிவினர் கைது செய்துள்ளனர்.
சந்தேகநபர்கள் சீதுவ, ஒருகொடவத்தை, கொழும்பு 10, மற்றும் கொழும்பு 14 ஆகிய பிரதேசங்களை சேர்ந்தவர்கள்.
இரகசிய தகவலின் பேரில், கிராண்ட்பாஸ் பொலிஸ் பிரிவுக்குட்பட்ட ஸ்டேஸ் வீதி பகுதியில் டிசம்பர் 27 அன்று அதிகாரிகள் சோதனை நடத்தினர்.
இந்த நடவடிக்கையின் போது, ஒரு சந்தேக நபர் ‘ஐஸ்’ உடன் கைது செய்யப்பட்டுள்ளார், இதனையடுத்து அவர் வாயிலாக ஒன்பது திருடப்பட்ட முச்சக்கர வண்டிகளை பொலிஸார் மீட்டெடுத்துள்ளனர்.
மறுநாள் (நேற்று 28) சீதுவ, மாளிகாவத்தை, கிராண்ட்பாஸ் மற்றும் வெல்லம்பிட்டிய ஆகிய இடங்களில் திருடப்பட்ட முச்சக்கர வண்டிகளை வைத்திருந்த மேலும் நான்கு சந்தேக நபர்கள் கைது செய்யப்பட்டனர்.
பின்னர் அவர்கள் கொழும்பு கோட்டை பொலிஸ் நிலையத்தில் ஒப்படைக்கப்பட்டனர்.
கோட்டை, கிரிபத்கொட, வத்தளை, பொரளை ஆகிய பொலிஸ் பிரிவுகளில் இந்த திருட்டுச் சம்பவங்கள் இடம்பெற்றுள்ளதாக விசாரணைகளில் தெரியவந்துள்ளது. கோட்டை பொலிஸார் சம்பவம் குறித்து மேலதிக விசாரணைகளை நடத்தி வருகின்றனர்.
