பலத்த எதிர்பார்ப்புடன் தமிழ்நாடு தேர்தல் முடிவுகள் நாளை மறுதினம் – காலை 8:00 மணிக்கு தொடங்கும் வாக்குப்பதிவுகள்
இந்திய மத்திய அரசுக்கும், இலங்கைத் தமிழர்களின் பிரச்சினைகளுக்கும் தீர்மானமிக்க காரணியாக விளங்கும் தமிழ்நாடு சட்டமன்றத் தேர்தல் முடிவுகளை வெளியிடுவதற்கான அனைத்து ஏற்பாடுகளும் தற்போது தயாராக உள்ளதாக இந்திய ஊடகங்கள் செய்தி வெளியிட்டுள்ளன.
இதன்படி, நாளை மறுதினம் காலை 8:00 மணி முதல் வாக்கு எண்ணிக்கை தொடங்கும்
எனவும் மதியத்திற்குப் பிறகு அல்லது மாலைக்குள் அதிகாரப்பூர்வ முடிவுகள் வெளியாகும் எனவும் எதிர்பார்க்கப்படுகிறது
வாக்கு எண்ணும் மையங்களில் பலத்த போலீஸ் பாதுகாப்பு போடப்பட்டுள்ளது
கடந்த ஏப்ரல் 23 ஆம் திகதி நடைபெற்ற வாக்குப்பதிவு மிகவும் விறுவிறுப்பாக அமைந்தது.
தமிழ்நாடு தேர்தல் வரலாற்றிலேயே இல்லாத வகையில் இம்முறை 85.15% வாக்குகள் பதிவாகியுள்ளன.
இது 2021 ஆம் ஆண்டு தேர்தலை விட சுமார் 11% அதிகமாகும்.
இம்முறைத் தேர்தலில் தமிழக வெற்றி கழகம் (TVK) கட்சி மூலம் களமிறங்கியுள்ள நடிகர் விஜய்யின் அரசியல் வருகை பெரும் எதிர்பார்ப்பை ஏற்படுத்தியுள்ளது.
அவர் இளைஞர்களின் வாக்குகளில் பெரும் தாக்கத்தை ஏற்படுத்தியுள்ளதாகக் கூறப்படுகிறது.
தற்போதைய முதலமைச்சர் மு.க. ஸ்டாலின் தலைமையிலான திராவிட முன்னேற்றக் கழகம் (DMK) மற்றும் அண்ணா திராவிட முன்னேற்றக் கழகம் (ADMK) – பா.ஜ.க (BJP) கூட்டணிக்கு இடையே கடும் போட்டி நிலவியது.
அரசியல் ஆய்வாளர்களின் கருத்துப்படி, மு.க. ஸ்டாலின் தலைமையிலான திமுக கூட்டணியே மீண்டும் ஆட்சியைக் கைப்பற்ற அதிக வாய்ப்புள்ளதாகத் தெரிவிக்கப்படுகிறது.
234 தொகுதிகளைக் கொண்ட தமிழ்நாடு சட்டமன்றத்தில் ஆட்சி அமைக்க குறைந்தபட்சம் 118 தொகுதிகளில் வெற்றி பெற வேண்டும்.
கடந்த தேர்தலில் திமுக கூட்டணி 159 இடங்களையும், அதிமுக கூட்டணி 75 இடங்களையும் பெற்றிருந்தன.
தமிழ்நாடு இந்தியாவின் இரண்டாவது பெரிய பொருளாதாரத்தைக் கொண்ட மாநிலம் என்பதால், இதன் வெற்றி இந்திய மத்திய அரசின் நிலைப்பாட்டிலும் செல்வாக்கு செலுத்தும் எனவும்
கச்சத்தீவு மீட்பு தொடர்பான தமிழ்நாட்டின் நிலைப்பாடு இலங்கைக்கு முக்கியமானது எனவும் சுட்டிக்காட்டப்பட்டுள்ளது.
இந்திய – இலங்கை இடையிலான பொருளாதார மற்றும் வர்த்தகத் தொடர்புகளில் தமிழக அரசின் அணுகுமுறை தாக்கம் செலுத்தும்.
புதியதாக அமையும் தமிழக அரசு, இலங்கைத் தமிழர்களின் பிரச்சினைகள் தொடர்பாக இந்திய மத்திய அரசுக்கு கொடுக்கும் அழுத்தங்கள், இரு நாடுகளுக்கும் இடையிலான எதிர்கால இராஜதந்திர உறவுகளைத் தீர்மானிக்கும் காரணியாக அமையும்.
