தலவாக்கலை – நுவரெலியா பிரதான சாலையில் போக்குவரத்து பாதிப்பு

தலவாக்கலை – நுவரெலியா பிரதான சாலையில் இன்று (13) அதிகாலை முதல் கனமழையுடன் கடும் பனிமூட்டமும் நிலவி வருவதாக தெரிவிக்கப்பட்டுள்ளது.

இதன் காரணமாக, அந்தச் சாலையூடான போக்குவரத்து நடவடிக்கைகள் பாதிக்கப்பட்டுள்ளதாக தகவல்கள் வெளியாகியுள்ளன.

இதற்கிடையில், ஹட்டன் – நுவரெலியா பிரதான சாலை மற்றும் அதனை அண்மித்த பக்கச் சாலைகளிலும் அடர்ந்த பனிமூட்டம் நிலவி வருவதால் வாகன ஓட்டிகள் சிரமங்களை எதிர்நோக்கி வருகின்றனர்.

குறைந்த காட்சித் தெளிவினால் விபத்துகள் ஏற்படும் அபாயம் காணப்படுவதால், அந்தப் பகுதிகளில் பயணிக்கும் வாகன ஓட்டிகள் தங்களின் முகப்பு விளக்குகளை ஒளிரவிட்டபடியும், மெதுவாகவும் மிகுந்த அவதானத்துடனும் வாகனங்களை செலுத்துமாறும் ஹட்டன் பொலிஸ் போக்குவரத்துத் திணைக்கள அதிகாரிகள் கேட்டுக்கொண்டுள்ளனர்.

மேலும், தேவையற்ற பயணங்களைத் தவிர்த்து, மலைநாட்டு சாலைகளில் பயணிக்கும் போது பாதுகாப்பு நடைமுறைகளை கடைப்பிடிக்குமாறும் பொதுமக்களுக்கு அறிவுறுத்தப்பட்டுள்ளது.