கண்டியில் வாகனம் மோதி மாணவன் உயிரிழப்பு

கண்டி மாவட்டத்தின் மஹியாவா பகுதியில் அமைந்துள்ள ஒரு சர்வதேச பாடசாலையில் ஏற்பட்ட விபத்தில் 7 வயது மாணவன் உயிரிழந்துள்ளார்.

இந்த விபத்து இன்று (12) இடம்பெற்றதாக தெரிவிக்கப்படுகிறது.

பாடசாலையின் வாரிய உறுப்பினர் ஒருவர் தனது வாகனத்தை நிறுத்திவிட்டு அதிலிருந்து இறங்கிச் சென்றதன் பின்னர், வாகனத்தின் பிரேக் பகுதியில் ஏற்பட்ட கோளாறு காரணமாக வாகனம் திடீரென நகரத் தொடங்கியுள்ளது.

அப்போது பாடசாலையில் தண்ணீர் குடித்துக் கொண்டிருந்த இரண்டு மாணவர்கள் மீது அந்த வாகனம் மோதியதில் ஒருவர் சம்பவ இடத்திலேயே உயிரிழந்ததாக தெரிவிக்கப்படுகிறது.

காயமடைந்த மற்றொரு மாணவர் தற்போது கண்டி பொது மருத்துவமனையில் சிகிச்சை பெற்று வருகிறார்.

சம்பவம் தொடர்பாக வாக்குமூலம் வழங்கிய வாகன உரிமையாளர், வாகனத்தை நிறுத்தி அதிலிருந்து இறங்கிய பின்னர் தான் இந்த விபத்து ஏற்பட்டதாக தெரிவித்துள்ளதாக கூறப்படுகிறது.

இந்த விபத்து தொடர்பான மேலதிக விசாரணைகள் மேற்கொள்ளப்பட்டு வருகின்றன.