பிஸ்கட், ஐஸ்கிரீம் மற்றும் சாக்லேட் உள்ளிட்ட இனிப்பு விலைகள் மே மாதம் வரை அதிகரிக்கப்படாது-இலங்கை இனிப்பு உற்பத்தியாளர்கள் சங்கம் அறிவித்துள்ளது

இலங்கையில் பிஸ்கட், ஐஸ்கிரீம் மற்றும் சாக்லேட் உள்ளிட்ட இனிப்பு வகை உற்பத்திப் பொருட்களின் விலை எதிர்வரும் மே மாதம் வரை அதிகரிக்கப்படாது என இலங்கை இனிப்பு உற்பத்தியாளர்கள் சங்கம் அறிவித்துள்ளது.

மே மாதம் வரை இனிப்பு வகைகளின் விலையில் மாற்றமில்லை
நேற்று (26) வர்த்தக, வாணிப, உணவுப் பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்க அவர்களுக்கும், இனிப்பு உற்பத்தியாளர்கள் சங்கத்தின் பிரதிநிதிகளுக்கும் இடையில் நடைபெற்ற கலந்துரையாடலின் போதே இந்த முடிவு எட்டப்பட்டுள்ளது.

விலை அதிகரிப்பு தவிர்ப்பு: உலகளாவிய ரீதியில், குறிப்பாக மத்திய கிழக்கில் நிலவும் போர்ச் சூழலால் மூலப்பொருட்களின் விலை அதிகரித்த போதிலும், எதிர்வரும் சித்திரைப் புத்தாண்டு காலத்தைக் கருத்திற்கொண்டு மே மாதம் வரை விலைகளை அதிகரிக்கப்போவதில்லை என உற்பத்தியாளர்கள் உறுதியளித்துள்ளனர்.

தற்போதைய பொருளாதாரச் சூழலில் மக்கள் விலையேற்றத்தைத் தாங்கிக்கொள்ளும் நிலையில் இல்லை என்பதால், நுகர்வோருக்குப் பாதிப்பு ஏற்படாத வகையில் தொழில்துறையை முகாமைத்துவம் செய்யுமாறு அமைச்சர் கேட்டுக்கொண்டார்.

சங்கம் சார்பில் பேசிய எஸ்.எம்.டி. சூரியப்பெரும, கொவிட் காலத்திற்குப் பிறகு வரையறுக்கப்பட்ட லாபத்துடனேயே இத்தொழில் இயங்கி வருவதாகவும், மார்ச் மற்றும் ஏப்ரல் மாதங்கள் வியாபாரத்திற்குச் சாதகமான காலம் என்பதால் தற்போதைக்கு விலையை உயர்த்தப்போவதில்லை என்றும் தெரிவித்தார்.

மே மாதத்திற்குப் பிறகு மின்சாரம், எரிவாயு மற்றும் மூலப்பொருட்களின் விலை மீண்டும் அதிகரித்தால் மட்டுமே விலைத் திருத்தம் குறித்து பரிசீலிக்கப்படும் என சங்கம் தெரிவித்துள்ளது. மேலும், உற்பத்தியாளர்கள் பின்வரும் கோரிக்கைகளை அமைச்சரிடம் முன்வைத்தனர்:

சுங்கத் திணைக்களத்தில் மூலப்பொருட்களை விடுவிப்பதில் ஏற்படும் தாமதங்களைத் தவிர்க்க நடவடிக்கை எடுத்தல்.

கப்பல் போக்குவரத்து மூலம் இறக்குமதி செய்யப்படும் பொருட்களுக்கு மேலதிக கட்டணங்கள் வசூலிக்கப்படுவதைச் சுட்டிக்காட்டினர்.

உற்பத்திப் பொருட்களை நாடளாவிய ரீதியில் விநியோகிப்பதற்குத் தடையின்றி எரிபொருள் கிடைப்பதற்கான முறையான பொறிமுறையொன்றை அமைத்துத் தருமாறு கோரிக்கை விடுத்தனர்.