தெஹிவளையில் கூலித்தொழிலாளியான முதியவரைத் தாக்கி பாக்கெட்டிலிருந்து 2100 ரூபாயை கொள்ளையடித்த வாலிபர் கைது

தெஹிவளை பகுதியில் முதியவர் ஒருவரை மனிதாபிமானமற்ற முறையில் தாக்கி, அவரிடமிருந்த பணத்தைப் பறித்துச் சென்ற சம்பவம் சமூக வலைதளங்களில் வீடியோவாகப் பரவி பெரும் அதிர்ச்சியை ஏற்படுத்தியது.

இது தொடர்பாக தெஹிவளை போலீஸார் இன்று (ஏப்ரல் 19) சந்தேக நபரைக் கைது செய்துள்ளனர்.

கடந்த ஏப்ரல் 17-ம் திகதி தெஹிவளை, வைத்திய வீதியில்
கூலி வேலை செய்து பிழைப்பு நடத்தும் 74 வயது முதியவரைத் தள்ளி கீழே விழச் செய்த சந்தேக நபர், அவரது சட்டையிலிருந்த 2,100 ரூபாய் பணத்தைப் பறித்துக்கொண்டு தப்பி ஓடினார்.

இந்தச் சம்பவம் தொடர்பான வீடியோ ஆதாரத்தைக் கொண்டு தெஹிவளை குற்றத்தடுப்புப் பிரிவினர் தீவிர விசாரணை மேற்கொண்டனர்.

இதனடிப்படையில் தெஹிவளை, ஓப்பன் பிளேஸ் பகுதியைச் சேர்ந்த 23 வயது இளைஞர் கைது செய்யப்பட்டார்.

குறித்த இளைஞர் கைது செய்யப்பட்ட போது அவரிடமிருந்து 5,200 மில்லி கிராம் ஐஸ் போதைப்பொருளும் கைப்பற்றப்பட்டது.

கைது செய்யப்பட்ட சந்தேக நபர் நாளை (ஏப்ரல் 20) Mount Lavinia நீதவான் நீதிமன்றத்தில் ஆஜர்படுத்தப்பட உள்ளார்.

தெஹிவளை போலீஸார் இது தொடர்பாக மேலதிக விசாரணைகளை மேற்கொண்டு வருகின்றனர்.