இலஞ்ச ஆணைக்குழுவிலிருந்து வெளியேறிய மஹிந்த ராஜபக்ஷ

ஸ்ரீலங்கன் ஏர்லைன்ஸ் நிறுவனத்துக்காக ஏர்பஸ் விமானங்கள் வாங்கப்பட்டதாகக் கூறப்படும் பரிவர்த்தனை தொடர்பான விசாரணைக்காக முன்னாள் ஜனாதிபதி மஹிந்த ராஜபக்ஷ இன்று காலை இலஞ்சம் அல்லது ஊழல் புலனாய்வு ஆணைக்குழுவில் ஆஜராகி சுமார் இரண்டு மணி நேரம் வாக்குமூலம் வழங்கிய பின்னர், ஆணைக்குழுவின் அறிவுறுத்தலின்படி அங்கிருந்து புறப்பட்டுச் சென்றதாக தகவல்கள் வெளியாகியுள்ளன.

குறித்த பரிவர்த்தனையில் இரண்டு மில்லியன் அமெரிக்க டாலர் இலஞ்சமாக பெற்றதாக சந்தேகத்தின் பேரில், சமீபத்தில் காலமான ஸ்ரீலங்கன் ஏர்லைன்ஸ் நிறுவனத்தின் முன்னாள் தலைமை செயல் அதிகாரி கபில சந்திரசேன மீது இலஞ்ச ஆணைக்குழு வழக்குப் பதிவு செய்துள்ளது.

மேலும், கபில சந்திரசேன முன்னாள் ஜனாதிபதி மஹிந்த ராஜபக்ஷவுக்கு மூன்று தவணைகளில் 60 மில்லியன் ரூபாய் வழங்கியதாக தெரிவித்ததாகவும், அது தொடர்பான தகவல்கள் நீதிமன்றத்தில் முன்வைக்கப்பட்டிருந்ததாகவும் இலஞ்ச ஆணைக்குழு முன்னதாக தெரிவித்திருந்தது.

இந்தச் சம்பவம் தொடர்பான மேலதிக விசாரணைகளுக்காக முன்னாள் ஜனாதிபதி மஹிந்த ராஜபக்ஷ ஆணைக்குழுவில் ஆஜராகுமாறு அறிவிக்கப்பட்டிருந்தது.

இதனிடையே, ஏர்பஸ் கொள்முதல் ஒப்பந்தம் தொடர்பான விசாரணைகளுக்காக தென் மாகாணத்தின் முன்னாள் ஆளுநர் வில்லி கமேஜும் நேற்று இலஞ்சம் அல்லது ஊழல் புலனாய்வு ஆணைக்குழுவில் வாக்குமூலம் அளிக்க அழைக்கப்பட்டிருந்தமை குறிப்பிடத்தக்கது.