தேசிய கலைக்கூடத்தில் 42 பழங்கால ஓவியங்கள் மாயம்
தேசிய கலைக்கூடத்தில் பாதுகாக்கப்பட்டிருந்த 42 பழங்கால ஓவியங்கள் காணாமல் போயுள்ளதாக மத மற்றும் கலாச்சார விவகாரங்கள் அமைச்சர் ஹினிதும சுனில் செனவி தெரிவித்துள்ளார்.
இன்று (21) பாராளுமன்றத்தில் இடம்பெற்ற வாய்மொழிக் கேள்வி நேரத்தின் போது பதிலளித்த அமைச்சர், இந்த விடயத்தை அதிகாரப்பூர்வமாக வெளியிட்டார்.
அமைச்சரின் தகவலின்படி, 2015 ஆம் ஆண்டு பண்டக ஆய்வு வாரியம் தேசிய கலைக்கூடத்தில் பாதுகாக்கப்பட்டிருந்த ஓவியங்கள் மற்றும் சிற்பங்கள் தொடர்பில் விரிவான கணக்கெடுப்பொன்றை மேற்கொண்டிருந்தது.
அந்த ஆய்வின் பின்னரே பல அரிய ஓவியங்கள் காணாமல் போயிருப்பது வெளிச்சத்துக்கு வந்துள்ளதாக தெரிவிக்கப்பட்டுள்ளது.
சரக்குப் பதிவேட்டில் மொத்தம் 281 ஓவியங்கள் பதிவு செய்யப்பட்டிருந்த போதிலும், தற்போது தேசிய கலை மாளிகையில் 239 ஓவியங்கள் மட்டுமே காணப்படுவதாக அமைச்சர் குறிப்பிட்டார்.
இந்த ஓவியங்கள் எவ்வாறு காணாமல் போனது என்பது தொடர்பில் உரிய விசாரணைகள் மேற்கொள்ளப்படவுள்ளதாகவும், தேசிய கலைச் செல்வங்களை பாதுகாக்க நடவடிக்கைகள் தீவிரப்படுத்தப்படும் என்றும் அமைச்சர் மேலும் தெரிவித்தார்.
