அரசு ஊழியர்களுக்கான ஊதியம் இல்லாத விடுப்பு உடனடியாக அமுலுக்கு வரும் வகையில் ரத்து
பொது நிர்வாக, மாகாண சபைகள் மற்றும் உள்ளூராட்சி அமைச்சு , அரசு ஊழியர்களுக்கான உள்நாட்டு மற்றும் வெளிநாட்டு ஊதியம் இல்லாத விடுமுறைகளை உடனடியாக அமலுக்கு வரும் வகையில் நிறுத்த முடிவு செய்துள்ளது.
நவம்பர் 24 அன்று நடைபெற்ற அமைச்சரவைக் கூட்டத்தில் எடுக்கப்பட்ட முடிவின் அடிப்படையில் இந்த நடவடிக்கை எடுக்கப்படுவதாக தொடர்புடைய சுற்றறிக்கையை வெளியிட்ட்டு பொது நிர்வாக, மாகாண சபைகள் மற்றும் உள்ளூராட்சி அமைச்சின் செயலாளர் எஸ். ஆலோக பண்டார,தெரிவித்துள்ளார்.
அதன்படி, புதிய விடுமுறை விண்ணப்பங்கள் அல்லது விடுமுறை நீடிப்பு விண்ணப்பங்களை ஏற்றுக்கொள்வது உடனடியாக நிறுத்தப்பட வேண்டும் என அமைச்சின் செயலாளர், அனைத்து அமைச்சுக்களின் செயலாளர்கள், மாகாண தலைமை செயலாளர்கள் மற்றும் திணைக்கள தலைவர்களுக்கு இந்த விடயம் சுற்றறிக்கை மூலம் தெரிவிக்கப்பட்டுள்ளது.
2022 ஜூன் 22 ஆம் திகதி பொது நிர்வாக அமைச்சினால் வெளியிடப்பட்ட சுற்றறிக்கை மூலம் அரசு ஊழியர்கள், உள்நாடு மற்றும் வெளிநாடு என இரண்டிலும் அதிகபட்சமாக 5 ஆண்டுகள் ஊதியம் இல்லாத விடுப்பு எடுக்க முடியும் என தெரிவிக்கப்பட்டது .( சிரேஷ்ட மற்றும் ஓய்வூதியத்திற்கு எந்தவித தாக்கத்தையும் ஏற்படுத்தாத வகையில் )
இருப்பினும், அமைச்சரவையின் தீர்மானத்தைத் தொடர்ந்து, இந்த சுற்றறிக்கையின் விதிகளின் கீழ் உள்நாட்டு மற்றும் வெளிநாட்டு விடுமுறைகளை அங்கீகரிப்பதை உடனடியாக நிறுத்த நடவடிக்கை எடுக்கப்பட்டுள்ளது.
மேலும் தற்போது உள்நாட்டு மற்றும் வெளிநாட்டு விடுமுறையில் உள்ள அரச அதிகாரிகள் அங்கீகரிக்கப்பட்ட காலத்திற்கு மட்டுமே அந்த விடுமுறையை எடுக்க முடியும் என்று கூறப்பட்டுள்ளது.
பொது நிர்வாக அமைச்சகத்தால் வெளியிடப்பட்ட சுற்றறிக்கையில், விடுமுறைக்கு ஒப்புதல் பெற்று, அந்த விடுமுறையை எடுக்க எதிர்பார்த்துள்ள அதிகாரிகள் அங்கீகரிக்கப்பட்ட காலத்திற்கு விடுமுறையை எடுக்க முடியும் என்று குறிப்பிடப்பட்டுள்ளது.
இந்த புதிய சுற்றறிக்கையானது , வெளிநாட்டு விடுமுறைக்காக ஏற்கனவே சமர்ப்பிக்கப்பட்ட புதிய விடுமுறை விண்ணப்பங்கள் மற்றும் விடுமுறை நீட்டிப்பு விண்ணப்பங்களை பாதிக்காது என்றும், தேவைகளைப் பூர்த்தி செய்யாத அல்லது சமர்ப்பிக்க வேண்டிய ஆவணங்களில் குறைபாடுகள் உள்ள விடுமுறை விண்ணப்பங்கள் மறுபரிசீலனை இல்லாமல் நிராகரிக்கப்படும் என்றும் சுற்றறிக்கையில் குறிப்பிடப்பட்டுள்ளது.
