இன்று இரண்டாவது நாளாகவும் இஸலாமாபாத்தில் தொடரும்அமெரிக்கா – ஈரான் வரலாற்றுச் சிறப்புமிக்க பேச்சுவார்த்தை

இஸ்லாமாபாத்தில் அமெரிக்காவிற்கும் ஈரானுக்கும் இடையிலான வரலாற்றுச் சிறப்புமிக்க நேரடிப் பேச்சுவார்த்தை இன்று இரண்டாவது நாளாகத் தொடர்கிறது.

1979 புரட்சிக்குப் பிறகு இரு நாடுகளுக்கும் இடையே நடைபெறும் மிக உயர்மட்ட அளவிலான பேச்சுவார்த்தை இதுவாகும்.

கடந்த ஆறு வாரங்களாக நீடித்த போரை முடிவுக்குக் கொண்டுவரவும், தற்காலிகப் போர்நிறுத்தத்தை நிரந்தரமாக்கவும் இந்தப் பேச்சுவார்த்தைகள் பாகிஸ்தானில் உள்ள ஒரு சொகுசு விடுதியில் நடைபெற்று வருகின்றன.

அமெரிக்கத் தரப்பில் துணைத் தலைவர் ஜே.டி. வான்ஸ் (JD Vance) மற்றும் ஜாரெட் குஷ்னர் ஆகியோர் தலைமை தாங்குகின்றனர்.

ஈரான் தரப்பில் நாடாளுமன்ற சபாநாயகர் முகமது பாகர் காலிபாஃப் மற்றும் வெளியுறவு அமைச்சர் அப்பாஸ் அராக்ஷி ஆகியோர் பங்கேற்றுள்ளனர்.

பேச்சுவார்த்தைகள் மிகவும் ஆழமாக நடைபெற்று வருவதாகவும், இதன் முடிவு எப்படி இருந்தாலும் அமெரிக்கா ஏற்கனவே போரில் வெற்றி பெற்றுவிட்டதாகவும் ஜனாதிபதி டொனால்ட் டிரம்ப் தெரிவித்துள்ளார்.

இந்தப் பேச்சுவார்த்தையில் உலகளாவிய எரிசக்தி போக்குவரத்திற்கு முக்கியத்துவமான ஹார்முஸ் நீரிணை விவகாரம் பெரும் முட்டுக்கட்டையாக உள்ளது.

தனது இரு கடற்படைக் கப்பல்கள் இந்த நீரிணையை கடந்து சென்றதாக அமெரிக்கா கூறுகிறது. ஆனால் ஈரான் இதனை திட்டவட்டமாக மறுத்துள்ளது.

: இந்த நீரிணை வழியாக ராணுவக் கப்பல்கள் செல்ல முயற்சித்தால் “கடுமையான பதிலடி” கொடுக்கப்படும் என்று ஈரான் எச்சரித்துள்ளது.

ஒருபுறம் அமைதிப் பேச்சுவார்த்தைகள் நடந்தாலும், மறுபுறம் லெபனானில் இஸ்ரேல் தனது தாக்குதல்களைத் தொடர்ந்து வருகிறது.

தெற்கு லெபனானில் உள்ள டெஃபாஹ்தா (Tefahta) நகரில் இஸ்ரேல் நடத்திய தாக்குதலில் குறைந்தது 13 பேர் கொல்லப்பட்டுள்ளனர்.

மார்ச் மாதம் முதல் தொடங்கிய இந்த மோதலில் லெபனானில் இதுவரை 2,000-க்கும் மேற்பட்டோர் உயிரிழந்துள்ளனர்.

இஸ்லாமாபாத் பேச்சுவார்த்தையின் முடிவு, வளைகுடா பிராந்தியத்தில் நிரந்தர அமைதி திரும்புமா அல்லது உலகளாவிய எரிசக்தி நெருக்கடி தீவிரமடையுமா என்பதைத் தீர்மானிக்கும்.