வேலைநிறுத்தத்தில் ஈடுபட்டுள்ள தபால் ஊழியர்களுக்கு ஆகஸ்ட் மாத சம்பளம் இல்லை

வேலைநிறுத்தத்தில் ஈடுபட்டுள்ள அஞ்சல் ஊழியர்களுக்கு இந்த மாத சம்பளம் வழங்கப்படாது என்று தபால் மா அதிபர் ருவான் சத்குமார அறிவித்துள்ளார்.

சம்பளம் தேவையென்றால் உடனடியாக பணிக்குத் திரும்புமாறு தெரிவித்து வேலைநிறுத்தத்தில் ஈடுபட்டுள்ள ஊழியர்களுக்கு அவர் கடிதம் அனுப்பியுள்ளார்.

வேலைநிறுத்தத்தில் ஈடுபட்டுள்ள தபால் தொழிற்சங்கங்களுக்கும் இது தொடர்பாக எழுத்துப்பூர்வமாக அறிவிக்கப்பட்டுள்ளதாகவும் தபால் மாஅதிபர் ருவான் சத்குமார கூறினார்.

இதேவேளை ,தபால் ஊழியர்களின் வேலைநிறுத்தம் காரணமாக இதுவரை அரசாங்கத்திற்கு ,சுமார் 140 மில்லியன் ரூபாய் இழப்பு ஏற்பட்டுள்ளதாக தபால் மாஅதிபர் ருவான் சத்குமார கூறினார்.

இருப்பினும்,, மத்திய அஞ்சல் பரிமாற்றத்தில் குவிந்து கிடக்கும் அஞ்சல் பைகள் விநியோகிக்கப்படுவதாக அவர் கூறுகிறார்.

“சம்பளம் வழங்குவதற்காக நாங்கள் திறைசேரியிடமிருந்து பணம் பெற வேண்டும். வேலைநிறுத்தத்தின் போது சம்பளக் கொடுப்பனவுகளுக்கு பணம் விடுவிக்கப்படாது என்று எனக்குத் தெரிவிக்கப்பட்டுள்ளது.

எனவே, வேலைக்கு வந்தவர்களுக்கு மட்டுமே பணம் விதிக்கப்படும். எனவே வேலை நிறுத்தத்தில் ஈடுபட்டுள்ளவர்கள் இன்று பணிக்கு வருமாறும் அறிவிக்கப்பட்டுள்ளது.”
என தபால் மாஅதிபர் ருவான் சத்குமார மேலும் கூறினார்.

கைரேகை இயந்திரத்தில் பதிவிடும் முறை மற்றும் மேலதிக நேர கொடுப்பனவு உட்பட 19 கோரிக்கைகளை முன்வைத்து இன்று ஐந்தாவது நாளாகவும் தபால் ஊழியர்கள் பணிபுறக்கணிப்பில் ஈடுபட்டு வருகின்றனர்.

இதற்கு பதிலளிக்கும் வகையில் , ”தபால்துறையில் தற்போது நடைமுறையில் இருக்கும் கைரேகை இயந்திரத்தில் பதிவிடும் முறை மற்றும் மேலதிக நேர வேலை தொடர்பான தபால் ஊழியர்கள் கோரிக்கைகள் தவிர்த்து ஏனைய 17 கோரிக்கைகளை பற்றிய பேச்சுவார்த்தைக்கு தயார்” என அமைச்சர் நளிந்த ஜயதிஸ்ஸ நேற்று பாராளுமன்றத்தில் தெரிவித்திருந்தார்.

இந்நிலையில் தமது கோரிக்கைகள் நிறைவேற்றப்படும் வரை பணிபுறக்கணிப்பை கைவிடப்போவதில்லையென தபால் ஊழியர்கள் தெரிவித்திருந்தமை குறிப்பிடத்தக்கது.