ஈரானின் உயர் தலைவர் அயதுல்லா அலி கமேனியின் அலுவலகங்களுக்கு அருகில் அமெரிக்கா இஸ்ரேல் தாக்குதல்

ஈரானின் தலைநகர் தெஹ்ரானில் இன்று (சனிக்கிழமை) காலை பாரிய வெடிப்புச் சத்தங்கள் கேட்டன.

ஈரானின் உயர் தலைவர் அயதுல்லா அலி கமேனியின் அலுவலகங்களுக்கு அருகில் இந்தத் தாக்குதல்கள் நடத்தப்பட்டுள்ளன. எனினும், 86 வயதான கமேனி தாக்குதல் சமயத்தில் தெஹ்ரானில் இருக்கவில்லை என்றும், அவர் பாதுகாப்பான இடத்திற்கு மாற்றப்பட்டதாகவும் ராய்ட்டர்ஸ் செய்தி வெளியிட்டுள்ளது.
இஸ்ரேல் முன்னெடுத்த இந்தத் தாக்குதலில் அமெரிக்காவும் பங்கேற்றுள்ளதாகத் தகவல்கள் தெரிவிக்கின்றன.
இதன் மூலம் மத்திய கிழக்கு பிராந்தியம் மீண்டும் ஒரு பாரிய இராணுவ மோதலை நோக்கித் தள்ளப்பட்டுள்ளது.

இந்தத் தாக்குதலில் அமெரிக்காவும் இணைந்து கொண்டதாக ஏபி (AP) செய்தி நிறுவனம் ஒரு அதிகாரியை மேற்கோள் காட்டி தெரிவித்துள்ளது.

அச்சுறுத்தல்களை அகற்றுவதற்காகவே இந்தத் தாக்குதல் நடத்தப்பட்டதாக இஸ்ரேல் பாதுகாப்பு அமைச்சர் இஸ்ரேல் காட்ஸ் விவரித்துள்ளார்.

ஈரான் மீதான தாக்குதலைத் தொடர்ந்து, பதிலடித் தாக்குதலாக ஏவுகணைகள் ஏவப்படலாம் என்ற அச்சத்தில் இஸ்ரேலின் டெல் அவிவ் (Tel Aviv) நகரம் முழுவதும் அபாய எச்சரிக்கை ஒலிகள் எழுப்பப்பட்டன.

பென் குரியன் விமான நிலையத்தில் இருந்த பயணிகள் மற்றும் ஊடகவியலாளர்கள் உடனடியாகப் பாதுகாப்பு இடங்களுக்குச் சென்றனர்.

பொதுமக்கள் அனைவரும் பாதுகாப்பு அறைகளுக்கு (Shelters) அருகிலேயே இருக்குமாறு இஸ்ரேலிய பாதுகாப்புப் படைகள் (IDF) அறிவுறுத்தியுள்ளன.

இந்தத் தாக்குதல்களைத் தொடர்ந்து, பாதுகாப்பு கருதி ஈரான் மற்றும் இஸ்ரேல் ஆகிய இரு நாடுகளும் தங்களது வான்பரப்பை (Airspace) மூடியுள்ளன.

இந்தத் தாக்குதலுக்குச் சில மணிநேரங்களுக்கு முன்னர் கருத்துத் தெரிவித்த அமெரிக்க ஜனாதிபதி டொனால்ட் ட்ரம்ப், ஈரானின் அணுசக்தி திட்டம் தொடர்பான பேச்சுவார்த்தைகளில் தான் திருப்தியடையவில்லை என்று கூறியிருந்தார். “அவர்கள் அணு ஆயுதங்களை வைத்திருக்க முடியாது” என்று அவர் வலியுறுத்தியிருந்தார்.

இந்திய அரசாங்கம் விடுத்துள்ள அறிவுறுத்தல்
மோசமடைந்து வரும் சூழலைக் கருத்திற் கொண்டு, இஸ்ரேலில் வசிக்கும் இந்தியப் பிரஜைகளுக்கு இந்தியத் தூதரகம் அவசர அறிவுறுத்தல்களை வழங்கியுள்ளது:

அனைத்து இந்தியர்களும் மிகுந்த அவதானத்துடன் இருக்குமாறும், பாதுகாப்பு வழிகாட்டல்களைப் பின்பற்றுமாறும் கேட்டுக்கொள்ளப்பட்டுள்ளனர்.

அத்தியாவசியமற்ற பயணங்களைத் தவிர்க்குமாறு அறிவுறுத்தப்பட்டுள்ளது.

அவசர உதவி எண்: +972-54-7520711

மின்னஞ்சல்: cons1.telaviv@mea.gov.in