பழைய QR போதுமா? புதிய பதிவு வேண்டுமா? ; எரிபொருள் பாஸ் குறித்து விளக்கம்

தேசிய எரிபொருள் பாஸ் (QR) அமைப்பு தற்போது முழுமையாக மீட்டெடுக்கப்பட்டு வழக்கம் போல் செயல்பட்டு வருவதாக டிஜிட்டல் பொருளாதார அமைச்சகம் அறிவித்துள்ளது.

எரிபொருள் கொள்முதல் செயல்முறையை சீராக்க வாகன உரிமையாளர்கள் பின்பற்ற வேண்டிய மூன்று முக்கிய வழிமுறைகளையும் அதிகாரிகள் வெளியிட்டுள்ளனர்.

அதன்படி, வாகன உரிமையாளர்கள் தங்கள் நிலையை அடையாளம் கண்டு கீழ்க்கண்ட வழிமுறைகளைப் பின்பற்றுமாறு கேட்டுக் கொள்ளப்பட்டுள்ளனர்.

பழைய QR குறியீடு பயன்படுத்துவோர்:
வாகன உரிமையிலும் அல்லது பதிவு செய்யப்பட்ட தொலைபேசி எண்ணிலும் மாற்றம் இல்லாதவர்கள் தங்களிடம் ஏற்கனவே உள்ள QR குறியீட்டைப் பயன்படுத்தி தொடர்ந்து எரிபொருளைப் பெறலாம்.

QR குறியீட்டை மீட்டெடுப்பது:
முன்பு பதிவு செய்திருந்தாலும் QR குறியீடு தொலைந்து போயிருந்தால் அல்லது தொலைபேசியிலிருந்து அழிக்கப்பட்டிருந்தால் மீண்டும் பதிவு செய்ய தேவையில்லை. கணினியில் உள்நுழைந்து மொபைல் தொலைபேசிக்கு அனுப்பப்படும் OTP குறியீட்டின் மூலம் QR குறியீட்டை மீட்டெடுக்கலாம்.

புதிய பதிவுகள்:
முன்பு பதிவு செய்யாதவர்கள், புதிய வாகனம் வாங்கியவர்கள் அல்லது பதிவு செய்யப்பட்ட தொலைபேசி எண்ணை தற்போது பயன்படுத்தாதவர்கள் புதியதாக பதிவு செய்ய வேண்டும்.

மேலும், இந்த செயல்முறையில் ஏற்படும் சிக்கல்கள் அல்லது கூடுதல் தகவல்களுக்கு 1919 என்ற ஹாட்லைன் எண்ணின் மூலம் அரசு தகவல் மையத்தை தொடர்புகொள்ளலாம் என அமைச்சகம் தெரிவித்துள்ளது.