லசந்த விக்ரமசேகராவின் கொலை தொடர்பான சந்தேக நபர்கள் மேலதிக விசாரணைகளுக்காக நிதிக் குற்றப் புலனாய்வுப் பிரிவிடம் (FCID) ஒப்படைக்கப்பட்டனர்
வெலிகம பிரதேச சபைத் தலைவர் லசந்த விக்ரமசேகராவின் கொலை தொடர்பாக கைது செய்யப்பட்ட , துப்பாக்கிதாரியாக அடையாளப்படுத்தப்பட்ட நபர் உட்பட சந்தேக நபர்கள் மேலதிக விசாரணைகளுக்காக நிதிக் குற்றப் புலனாய்வுப் பிரிவிடம் (FCID) ஒப்படைக்கப்பட்டுள்ளனர் .
அடுத்த கட்ட விசாரணைகளை FCID மேற்கொள்ளவதாக பொலிஸ் ஊடகப் பிரிவு அறிக்கை ஒன்றை வெளியிட்டுள்ளது.
கொலை தொடர்பாக நேற்றைய தினம் மட்டும் ஏழு சந்தேக நபர்கள் கைது செய்யப்பட்டனர்.
நேற்று அதிகாலை, அனுராதபுரம், கெகிராவ பகுதியில் சம்பவம் தொடர்பாக இரண்டு ஆண் சந்தேக நபர்களும் ஒரு பெண் சந்தேக நபரும் கைது செய்யப்பட்டனர்.
பிரதேசத்திலிருந்து தப்பிச் சென்ற துப்பாக்கிதாரி, நேற்று மாலை மஹரகம, நாவின்னவில் கைது செய்யப்பட்டார்.
பொலிஸ் விசேட அதிரடிப்படை பிரிவு (STF), புலனாய்வு பிரிவின் அதிகாரிகள் மற்றும் போலீசார் இணைந்து மேற்கொண்ட நடவடிக்கையின் போது இந்த குழுவினர் கைது செய்யப்பட்டனர்.
பொலிஸ் மாஅதிபரின் நேரடி மேற்பார்வையின் கீழ் பத்து சிறப்புப் புலனாய்வுக் குழுக்கள் இந்த சம்பவம் தொடர்பிலான விசாரணைகளுக்கு நியமிக்கப்பட்டுள்ளதாக தெரிவிக்கப்பட்டுள்ளது.
தெற்கு மாகாணம், மேல் மாகாணம் மற்றும் குற்றப் புலனாய்வுத் துறை (CID) ஆகியவற்றின் சிரேஷ்ட துணை ஆய்வாளர்கள் , புலனாய்வு பிரிவு , விசேட அதிரடிப்படை , கொழும்பு பிரிவு, மேற்கு மாகாண தெற்குப் பிரிவு, நிதிக் குற்றப் புலனாய்வுப் பிரிவு, குற்றப் பதிவுப் பிரிவு மற்றும் தெற்கு அதிவேகப் போக்குவரத்துப் பிரிவினர் இந்த விசாரணை குழுக்களில் இடம்பெற்றுள்ளனர்.
நேற்றைய கைது நடவடிக்கைகளின் போது, வெலிகம பிரதேச சபைத்தலைவரின் கொலைக்காக பயன்படுத்தப்பட்டதாக நம்பப்படும் ஒரு மோட்டார் சைக்கிளையும் போலீசார் கைப்பற்றியுள்ளனர்.
சந்தேக நபர்களிடமிருந்து ரூ. 1.2 மில்லியனுக்கும் அதிகமான பணம் , ஹெராயின், படிக மெத்தம்பேட்டமைன் (ஐஸ்) மற்றும் போதைப்பொருள் தயாரிக்கப் பயன்படுத்தப்படும் உபகரணங்களையும் போலீசார் கைப்பற்றியுள்ளனர்.
கடந்த ஒக்டோபர் 22 ஆம் திகதி , வெலிகம பிரதேச சபைத் தலைவர் லசந்த விக்ரமசேகர அவரது உத்தியோகபூர்வ அலுவலகத்தில் , பொது மக்கள் சந்திப்பு தினத்தில் அடையாளம் தெரியாத துப்பாக்கிதாரியால் சுட்டுக் கொல்லப்பட்டார்.
