ரவிராஜ் கொலை வழக்கில் 10 வருடங்களுக்கு முன்வழங்கப்பட்ட விடுதலை தீர்ப்பு ரத்து – புதிய விசாரணைக்கு உத்தரவு
நாடாளுமன்ற உறுப்பினர் நடராஜா ரவிராஜ் படுகொலை வழக்கில் குற்றம் சாட்டப்பட்டிருந்த கடற்படை புலனாய்வு அதிகாரிகள் உள்ளிட்டோரை விடுதலை செய்து வழங்கப்பட்ட தீர்ப்பை மேன்முறையீட்டு நீதிமன்றம் இன்று (மார்ச் 26, 2026) ரத்து செய்துள்ளதுடன், இந்த வழக்கை மீண்டும் விசாரணை செய்யுமாறு உத்தரவிட்டுள்ளது.
மேன்முறையீட்டு நீதிமன்ற நீதியரசர்களான பி. சசி மகேந்திரன் மற்றும் அமல் ரணராஜா ஆகியோரைக் கொண்ட நீதியரசர்கள் குழாம் இந்தத் தீர்ப்பை வழங்கியது.
2006 நவம்பரில் கொழும்பில் வைத்து தமிழ்த் தேசியக் கூட்டமைப்பின் நாடாளுமன்ற உறுப்பினர் நடராஜா ரவிராஜ் மற்றும் அவரது பாதுகாவலர் பொலிஸ் உத்தியோகத்தர் லக்ஷ்மன் ஆகியோர் சுட்டுக்கொல்லப்பட்டனர்.
2016 ஆம் ஆண்டு கொழும்பு மேல் நீதிமன்றத்தில் ஜூரிகள் முன்னிலையில் நடைபெற்ற விசாரணையின் முடிவில், மூன்று கடற்படை புலனாய்வு அதிகாரிகள் உட்பட அனைத்து பிரதிவாதிகளும் ஒருமனதாக விடுதலை செய்யப்பட்டனர்.
இந்த விடுதலையை எதிர்த்து சட்டமா அதிபர் மேன்முறையீடு செய்திருந்தார். அதில் பின்வரும் முக்கிய விடயங்கள் சுட்டிக்காட்டப்பட்டன:
வழக்கின் முக்கிய சாட்சியான (மன்னிப்பு வழங்கப்பட்ட சாட்சி) ஒருவரின் சாட்சியத்தை எவ்வாறு மதிப்பிடுவது என்பது குறித்து மேல் நீதிமன்ற நீதிபதி ஜூரிகளுக்குச் சரியான வழிகாட்டல்களை வழங்கவில்லை.
ஜூரிகளுக்கான அறிவுறுத்தல்கள் இரவு தாமதமாக ஆரம்பிக்கப்பட்டு, இரவு 11:00 மணி வரை நீடித்ததுடன், நள்ளிரவுக்குப் பின்னரே தீர்ப்பு வழங்கப்பட்டது. இது ஒரு அசாதாரணமான நடைமுறை என நீதிமன்றம் அவதானித்துள்ளது.
வழக்கின் ஆதாரங்களை மறுபரிசீலனை செய்த மேன்முறையீட்டு நீதிமன்றம், இந்த வழக்கை முன்னெடுத்துச் செல்வதற்குப் போதிய சான்றுகள் இருப்பதாகக் கருதியது. எனவே பழைய தீர்ப்பு ரத்து செய்யப்பட்டது.
மேல் நீதிமன்றத்தில் இந்த வழக்கை புதிய விசாரணையாக மீண்டும் ஆரம்பிக்க உத்தரவிடப்பட்டது.
